09 Nobyembre - Piyesta sa Paghalad sa Basilica sa San Juan de Letran sa Roma

Karong adlawa, gisaulog ang Kapistahan sa Paghalad (dedication) sa Arsbasilica San Juan de Letran sa Roma, ang "katedral" sa Arkidiyosesis sa Roma. Ang iyang tibuok nga ngalan mao kini: Arsbasilica sa Labing Santos nga Manluluwas (Hesukristo) ug ni San Juan Bautista ug Ebanghelista sa Letran." Kini gitawag og "arsbasilica," buot ipasabot "pangulo" o "nag-una"(ars or arch) nga basilica o lingkuranan sa pangulo sa diyosesis sa Roma nga mao ang Santo Papa. Ang unang paghalad niini gihimo ni Papa Silvestre I niadtong tuig 324. Isip lingkuranan sa Obispo sa Roma, mas labaw kini og kahalangdon o importansya kaysa mas naila nga Basilica ni San Pedro sa sulod sa siyudad sa Vaticano.

06 NOBYEMBRE: IKA-32 NGA DOMINGO SA ORDINARYONG PANAHON

Mga Pagbasa: a) Kinaadman 6,12-16; b) 1 Tess. 4,13-18; c) Mateo 25,1-13

Duha na lamang ka Domingo ug matapos na usab ang atong kalendaryo-liturhiko ug moabot na usab ang panahon sa Adbyento. Sama sa ato nang namatngonan, ang mga pagbasa sa Liturhiya niining mga Domingoha nag-aghat kanato sa pagpamalandong sa pag-abot sa Ginoo o sa katapusan sa panahon. Ug tungod kay wala man lagi nato mahibalo i ang tukmang takna o adlaw sa pag-abot sa Ginoo, giawhag kita sa pagbantay, pagtukaw, ug pagpangandam. Kon buhaton nato kini, nagpadayag kini nga kita maalamon ug dili mga danghag o hungog, sama sa gisaysay usab sa sambingay diha sa atong ebanghelyo karon.

Agi'g sugyot alang sa pamalandong diha sa Santos nga Misa, mahimong atong ipunting ang atong paambit sa bisan hain niining mga tema: a) ang kabililhon sa KAALAM (dili lang Kahibalo) diha sa atong kinabuhi isip magtutuo ug bisan gani diha sa atong kinabuhi sa katilingban; b) ang PAG-ABOT SA GINOO, o KATAPUSAN SA KALIBUTAN, kon unsay kahulugan niini sa atong Pagtuo; c) ang aghat sa PAGTUKAW, PAGKAMABINANTAYON ug PAGLAHUTAY SA ATONG MGA GIMBUHATON O KAAKUHAN SAMTANG NAGPAABOT SA GINOO.

Pasiuna

Kining maong "blog" namugna agig pagtubag sa hangyo ug hagit sa usa ka higalang pari nga akong ipaambit usab sa Kabisay-an ug Mindanao ang akong gamay nga kahibalo bahin sa Pulong sa Diyos. Ang "format" niini medyo susama sa uban nga mga "leaflet" sama sa "Mag-ambahan" ug uban pa nga nagsilbing gabayan sa mga magtutuo o manimbahay sa ilang pag-apil sa Liturhiya matag Domingo. Hinaut nga kini makatabang pagpalalom sa Pagtuo ug sa pagmahal sa Pulong sa Diyos nga kanunay'ng buhi. Daghang salamat.